9 тамыз күні түнгі сағат 03:00 шамасында Атырау қаласы Жерұйық мөлтек ауданында орналасқан көшелердің бірінде Toyota Camry және Lada 21725 маркалы автокөліктерінің бірнеше адамды көлік үстіне мінгізіп, жолаушылар тасымалдау ережелерін бұзып, олардың өмірі мен денсаулығына қауіп төндіретін әрекеттер жасап жүрген бейнежазбасын достары әлеуметтік желіге жүктеген, деп хабарлайды Depti.kz тілшісі.
– Аталған бейнежазба бойынша, патрульдік полиция қызметкерлері тексеру барысында, жоғарыда атап өткен өрескел әкімшілік құқықбұзушылықты жасап жүрген Toyota Camry және Lada 21725 маркалы автокөліктерінің 18 және 19 жастағы жүргізушілері анықталды. Олар өздерінің 9 тамыз күні досының туған күнінде көлік құралының салонынан тыс жерде жолаушылар тасымалдағандықтарын айтып, өз кінәларын толықтай мойындаған.
Сол себепті, 19 жастағы Toyota Camry автокөлігінің жүргізушісіне қатысты ҚР ӘҚБтК-нің 593-бабының 3 бөлімімен (Жолаушыларды және жүктердi тасымалдау қағидаларын сақтамау, осы баптың бiрiншi және екінші бөлiктерiнде көзделген, әкiмшiлiк жаза қолданылғаннан кейiн бiр жыл iшiнде қайталап жасалған әрекеттер)_ және ҚР ӘҚБтК-нің 612 бабының 1 бөлімімен _(Құжаттары жоқ және басқару құқығы жоқ адамның көлiк құралын басқаруы) әкімшілік хаттамалар жасақталып, 29 170 теңге көлемінде айыппұл салынды.
Ал, 18 жастағы “Lada 21725” маркалы автокөлігінің жүргізушісіне қатысты ҚР ӘҚБтК-нің 590 бабының 10 бөлімімен (Көлiк құралдарын пайдалану қағидаларын бұзу, Осы баптың бiрiншi, бесінші, алтыншы, жетінші және тоғызыншы бөлiктерiнде көзделген, әкiмшiлiк жаза қолданылғаннан кейiн бiр жыл iшiнде қайталап жасалған әрекеттер) және ҚР ӘҚБтК-нің 593 бабының 3 бөлімімен (Жол жүрiсi қағидаларында көзделген жолаушыларды және жүктердi тасымалдау, қауiпсiздiк белдіктерiн немесе мотошлемдердi пайдалану жөніндегі талаптарды сақтамау, осы баптың бiрiншi және екінші бөлiктерiнде көзделген, әкiмшiлiк жаза қолданылғаннан кейiн бiр жыл iшiнде қайталап жасалған әрекеттер) әкімшілік хаттамалар жасақталып, 43 755 теңге көлемінде айыппұлдар салынды – деді, Атырау облысы полиция департаментінің бастығы полиция полковнигі Қамза Үмбетқалиев.
Амандық САҒЫНТАЙҰЛЫ