Атырауда төбесіндегі гипс қаптамалары құлап, оқушылары қашықтан оқуға жіберілген мектеп директоры қатаң сөгіспен құтылды.
Бұл туралы Express Qazaqstan мәлім етті. Атырау қаласындағы үш тілде оқытатын дарынды балаларға арналған №30 мектеп-гимназиясы күрделі жөндеуді қажет етеді. Осы айда мектептің төбесіндегі гипс қаптамалары құлап, мектепте оқитын екі мыңнан астам оқушыға қауіп төнген болатын.
- Білім беру басқармасы жанынан арнайы жұмыс тобы құрылып, қызметтік тексеріс жүргізілді. Мектеп басшысына «сөгіс» түрінде шара қолданылды. Мәселе қатаң бақылауда болады,- деді облыс әкімінің орынбасары Бақытгүл Хаменова.
Қазір мектепке техникалық қорытынды негізінде жөндеу-сметалық құжаттамасы дайындалып, соған сәйкес шатырға күрделі жөндеу жүргізіледі.