ПІКІР: Жалақысы жоғары болса, маман табылады!
Дәстүрлі тамыз кеңесі үнемі маңызды мәселелерді қамтып, білім берудің жаңа мүмкіндіктеріне жол ашып отырады, деп хабарлайды Depti.kz тілшісі.
Осы орайда, біз болашақ мұғалім, Батыс Қазақстан мемлекеттік университетінің студенті Шұғыла Еңсепті сөзге тарттық.
– Бұған дейінгі жиындарда мұғалімдердің мәртебесі мен оларды артық қызметтен босату мәселесі талқыға түсіп, шешімін тапқан еді, – дейді ол бізбен әңгімесінде. – Бұл сөзіме бүгінде сәтті жүзеге асырылып келе жатқан «Педагог мәртебесі туралы» Заң дәлел. Енді алдағы төрт жылда ұстаздардың жалақысы екі есе өсіп, педагог мамандарды жұмысқа қабылдау жүйесі түбегейлі өзгермек.
Білім және ғылым министрі Асхат Аймағамбетов бастаған бүгінгі білім беру жүйесінің заман ағымына сай жаңарып жатқаны жастарды, соның ішінде мен сияқты болашақ мұғалімдерді ерекше қуантады.
Рас, тұрмыс түзелмей, қай-қай бастама да алға баспайды. Сол секілді, ұстаз деген ұлы тұлғаның мәртебесі де еңбегіне сай жоғары жалақымен бекітілуі керек деп ойлаймын. Осы орайда, келесі жылдан бастап балабақша, мектеп және колледж педагогтерінің еңбекақысы тағы 25 пайызға артатыны – өте құптарлық жаңалық. Жалақысы жоғары мамандықты кім жақсы көрмейді? Ендеше, ертең мектеп түлектерінің біразы мұғалім болуға ұмтылса, таң қалмаңыз.
Мен де ұстаз болуды армандаймын. Соған сай қажетті білім-білікпен қаруланып жатырмын. Айтпақшы, жаңа оқу жылынан бастап педагогтер жұмысқа конкурстық негізде қабылданатын болады. Мұны министрдің өзі айрықша атап өтті. Енді мұғалімдер жұмысқа директор арқылы емес, нақты және біліктілік талаптарына сай конкурстық негізде электрондық форматта қабылданады деген сөз.
Үшіншіден, биылғы қыркүйектен бастап дипломнан бөлек, «педагог» біліктілігін алу жөнінде жаңа талап қойылмақ. Бұл ретте, «Өрлеу» біліктілікті арттыру ұлттық орталығы педагогикалық мамандықтар бойынша білім алып жатқан педагогтер мен студенттерге тегін курстар ұйымдастырады екен. Демек, білікті ұстаз болу үшін барлық жағдай жасалып отыр. Бұдан артық не керек? Тек зор мүмкіндікті молынан пайдалану қажет.
Сайып келгенде, мұның бәрі де уақыт туындатқан өзгерістер екенін түсіну керек. Сағат тілі бір орында тұрмайды. Сол сияқты, білім беру саласы да жыл сайын жаңарып отырғаны жөн. Себебі, қазақ білімі мен ғылымы өз қазанында қайнап жатпауы керек. Қазіргі қарыштап дамыған заманда «дайын асқа тік қасық» болып, болдым-толдым деп отыру жарамайды. Сондықтан инновациялық педагогикалық технологияны әлі де жетілдіре түсу қажет деп санаймын.
Әңгімелескен: Амандық САҒЫНТАЙҰЛЫ
