Атыраулық полицейлер жағдайы төмен отбасыға көмектесті
Полиция қызметкерлері жайсыз отбасы есебінде тұрған 1989 жылғы азаматшаның үш баласының тұрмыс жағдайларын тексеріп, қамқорлық танытып тұрады.
«Ауладағы қоқысты айтпағанда, үй ішіне кіре берістен төрге дейін аяқ алып жүргісіз шашылып жатқан тұрмыстық заттар мен киім-кешек, тағам қалдықтары, үйіліп жатқан қоқыс», – депті облыстық ПД баспасөз қызметі.
Полиция қызметкерлерімен бірге келген бір топ жас еріктілер санитарлық жағдайды көріп, үйдің іші-сыртын жинап беруге өз ұсыныстарын білдірді. Келесі күні полиция қызметкерлерімен бірге келген еріктілер тобының мүшелері үйдің іші-сыртын жинастырып, ыдыстарын жуып, төсеніштерін қағып-тазалап берді.
«Полиция қызметкерлері өткен жылы мамыр айында қаладағы Химиктер поселкесінде тұратын 1989 жылы туған бұл азаматшаның балаларын қаладағы кәмелетке толмағандарды бейімдеу орталығына өткізген болатын. Кейіннен үйінің тазалығын қалпына келтіріп, алдағы уақытта балаларының жағдайына көңіл бөлетінін айтқаны ескеріліп, 2009ж., 2015ж.,2017 жылғы сәбилер отбасына қайтарылды», – депті облыстық ПД баспасөз қызметі.
Балалар өз отбасына оралғаннан соң, жағдайды көріп-білуге келген полиция қызметкерлерін бүгінгі көрініс тағы алаңдатты. Тұрмыс жағдайына салғырттықпен қарап отырған 30-жастағы азаматшаға, балалардың жай-күйі полиция инспекторларымен тағыда тексерілетіні туралы ескерту жасалды.
