Инфографика

Дәстүрлі «Жыл кәсіпкері» шарасында сала үздіктері мен белсенді бизнес иелері марапатталды. Тәуелсіздіктің мерейлі 30 жылдығында өтіп отырған биылғы салтанаттың сәні бөлек.

Кәсіпкерлер сынға түсетін байқауды бұл жолы облыстық кәсіпкерлік және индустриалдық-инновациялық даму басқармасы, өңірлік кәсіпкерлер палатасы мен «Атырау облысының кәсіпкерлері мен жұмыс берушілер одағы» қоғамдық бірлестігі ұйымдастырды.

Осындағы кәсіпкерлер палатасының өкілі Әсел Тұяқбаевның айтуынша, конкурстық комиссия 15 қараша мен 15 желтоқсан аралығында үміткерлердің өтініштерін қабылдап, 20 желтоқсанға дейін алты аталым мен ең басты жеңімпаз анықталған. Облыс әкімінің бірінші орынбасары Серік Айдарбеков ел экономикасын дамытуға үлкен үлес қосып жүрген кәсіпкерлерге аймақ басшылығының алғысын жеткізді. Өз кезегінде кәсіпкерлер палатасының өңірлік кеңесінің төрағасы Гүлмира Жұмағалиева мен «Атырау облысының кәсіпкерлері мен жұмыс берушілер одағының» төрағасы Айбар Жаниязов пандемияның салдарына қарамастан жергілікті кәсіпкерлер қандай қиындыққа да қасқайып қарсы тұрғанын айрықша атап өтті.

– Тәуелсіздіктің отыз жылында Қазақстанымыз адам танымастай өзгерді. Халықаралық аренадағы абыройымыз артып, беделіміз биіктеді. Бұған түрлі экономикалық реформалар мен жаңашыл бастамалар себепкер болды. Осы уақыт ішінде нарықтық экономика қарқынды дамуы үшін көптеген алғышарттар жасалды. Мемлекеттік қолдау аясында атыраулық бизнес те жыл сайын мол табысқа кенеліп, зор жетістікке жетіп отыр. Жаңадан ашылған жүздеген кәсіпкерлік нысандар мен мыңдаған жұмыс орны – осы сөзіміздің айғағы. Атқарушы билік, кәсіпкерлер мен қоғамдық қауымдастық бір жағадан бас, бір жеңнен қол шығарғанда ғана осындай табысқа кенелуге болады, – деді Гүлмира Сабырқызы.

Сонымен, байқау қорытындысы бойынша «Шишка» дәмханасының иесі Ару Камалова – «Жас кәсіпкер», «Кофе бум» кофеханасының иесі Әлішер Жуасбаев – «Қызмет көрсету саласының үздігі»,  Атырау қаласындағы Бубновский орталығының директоры Риза Мұрзагалиева – «Медициналық қызмет көрсету саласының үздігі», «Достан Ата» шаруа қожалығының жетекшісі Сейтжан Балжігітов – «Үздік шаруа қожалығы», «УльтраСтаб» жауапкершілігі шектеулі серіктестігінің басшысы Азамат Асылбеков – «Үздік өндіруші», «НурАтырауКурылыс» ЖШС директоры Нұрлан Нұрмұханов – «Құрылыс бизнесі саласының үздігі» атанды.

Ал, «Prime Family Group» компаниялар тобының құрылтайшысы Нұрлан Мұқұшев «2021 жылдың ең үздік кәсіпкері» атанды.

Ол 14 жылдан бері қоғамдық тамақтану саласында жемісті еңбек етіп келеді. Іскер азаматтың бастамасымен – «Гинза-Атырау» мейрамханасы, «Бармаглот» дәмханасы, «Казбургер» тез тамақтану орындарының желісі, қалаға арналған «Фреш энд гоу» дәмханасы, «Чобан» ет мейрамханасы, «Бэйкерист» наубайханасы, «Ви Бренд» креативті агенттігі ашылған болатын. Бүгінде «Prime Family Group» компаниялар тобында 500 адам жұмыс жасайды.

– Мұндай маңызды марапатқа алғаш рет ие болып отырмын. Бұл тек менің ғана жетістігім емес, біздің компания қызметкерлерінің көп жылғы бірлескен еңбегінің нәтижесі. Барлық бизнес жетекшілерінің басын қосқан байқау ұйымдастырушыларына алғысым шексіз, – деді ағынан жарылған жеңімпаз.

Сондай-ақ, осы кеште «Бизнестану «Әлия» байқауының жеңімпазы – «AND Development» ЖШС директоры Бақыт Ысқақова, «Аруана» бизнес құрмет» республикалық премиясының иегері – «Бірлік – Миялы» кешенінің басшысы Айжан Ізімова марапатталды. 

Амандық САҒЫНТАЙҰЛЫ

2018 жылы құрылған Атырау облыстық балық шаруашылығы басқармасы үш бағытта жұмыс жасап келеді, деп хабарлайды Атырау облысының Балық шаруашылығы басқармасының баспасөз қызметі.

Атап айтқанда, бұл – балық аулау (өндіру) және оны өңдеу (экспорт), қолдан балық өсіру (аквакультура) және балық қорларын қорғау және өсімін молайту. Атырауда балық аулаумен 18 кәсіпорын айналысады. Оның екеуі – бекіре балық өсіру зауыттары.

Аталған басқарма басшысы Артур Сәдібекұлының айтуынша, 2019 жылмен салыстырғанда, өткен жылы балық аулау мен экспорт үлесі 6-19 пайызға өскені байқалады.

«Елімізде өндірілетін (ауланатын) балықтың 30%-ы Жайық-Каспий бассейінінде ауланады. Яғни, Атырау еліміз бойынша көш бастап тұр деген сөз. Қазір балық аулаумен бірге, оны қолдан өсіруге де зор көңіл бөлініп жатыр. Десек те, шешімін күткен мәселелер де жоқ емес. Мәселен, осыдан 30-50 жыл бұрынғы жүзу кемелері заманауи талапқа сай келмейді» дейді ол.

Екінші бағыт – балық өсіру бойынша да тыңғылықты жұмыстар атқарылуда.

«Биыл шілде-тамыз айларында «Жайық-Атырау бекіре балық өсіру зауыты» мен «Атырау бекіре балық өсіру зауыты» Жайық өзеніне 7 миллионнан астам бекіре тұқымдас балық шабақтарын өсімге жіберді» дейді басқарма басшысы.

Енді басқармамен 2021-2030 жылдарға арналған Балық шаруашылығын дамытудың өңірлік бағдарламасы бекітіліп отыр. Ол жүзеге асса, тауарлы балық өсіру көлемі 15 мың тоннаға, балық өнімін экспорттау көлемі 25 мың тоннаға артады. Ал, Жайық-Каспий бассейнінде кәсіптік балық аулау көлемі 1,5 есеге көбейіп, жылына 25 мың тоннаны құрамақ. Сондай-ақ, 511 жаңа жұмыс орны ашылады деп күтілуде.

Амандық САҒЫНТАЙҰЛЫ