АТЫРАУДА

Атырауда жаңа жоба жұртшылыққа жол тартты, деп хабарлайды Depti.kz тілшісі.

Атап айтқанда, Исатай аудандық жастар ресурстық орталығы “Жастар LIFE” жобасын жүзеге асыруды жолға қойды. Мұндағы мақсат – жастарды ауылға тарту, егін және мал шаруашылығымен айналысуға шақыру.

Исатайлық жастар “Нұрхат” шаруа қожалығына барып, ондағы шаруалардың тыныс-тіршілігімен танысып қайтты. Аталған шаруашылық иесі Нұрхат Құмарбеков “Ауыл шаруашылығын қаржылай қолдау қорынан” несие алу арқылы бизнес бастаған екен. Сондай-ақ, ол респубикалық жастар слетіне де қатысып, біраз тәжірибе жинап қайтқанын да тілге тиек етті.

Сөйтіп, жоба қатысушылары бір сәт қырдағы қарбаласты өз көздерімен көрді. Қыздар болса, қызыл шоққа нан пісіріп, сиыр саууды және жетім қалған қозы-лақты тамақтандырып, аяқтандыруды үйретті. Сондай-ақ, сойылған малдың шек-қарнын қалай тазалау кеерктігін де біліп алды. Солардың бірі – Анар Шұғылан. Ол ауылдың болашағы зор екенін айтады.

• “Қазіргі жастар мал бағып, егін егуден қашып жатады. Жалпы, қазіргі қоғам қиындықтан қашады. Тіпті, қарапайым қой терісін де “иісі шығады” деп лақтырып жатамыз. Ал, егер оны өңдейтін өндіріс орнын ашып, соған тапсыратын болсақ, Қытайдан киім тасымайтын едік қой. Шындығына келгенде, табыстың кілті атакәсіпте екенін түсінбей жүрміз. Мен жаңа жоба арқылы осы мәселенің шешімін тапқым келеді” дейді ол.

Сол сияқты, жігіттер жағы да қарап қалған жоқ. Олар ер қанаты – атқа мініп, “қой кезекке” шықты. Төскейде төрт түлік түлеткен ата-баба салтының қыр-сырын меңгерді.

Аудандық кәсіпкерлік және ауыл шаруашылығы бөлімінің басшысы Нұрберген Өтегенов бұл жобаның өскелең ұрпақ үшін берері мол деп сендіреді.

– Қырда қайнаған тынымсыз тіршілік туралы есту бір бөлек, көзбен көру мүлде басқа дүние. Ауыл шаруашылығымен айналысудың қызығы мен қиындығын жастарға көрсеткіміз келеді. Егін егіп, мал өсіремін, жергілікті халықты табиғи таза өніммен қамтамасыз етемін деген жанға мемлекет тарапынан барлық жағдай жасалған. Ендеше, осыны жан-жақты насихаттай беру керек. Атырау тек өндірісті өңір ғана емес, ауыл шаруашылығы дамыған агроаймақ болып та табылады, соны ұмытпау керек. Алдағы уақытта теңіз туризміне қатысты түйткілдерді түсіндіру де жоспарда бар.

Амандық САҒЫНТАЙҰЛЫ

Қызылқоға ауылдық округі, Қарабау ауылының тұрғындары «Мұздыбұлақ-Қарабау» топтық су құбырын сенімгерлікпен басқарып отырған «Асыл-Агро» шаруа қожалығының үстінен шағымдарын айтты, деп хабарлайды Depti.kz тілшісі.

Осыған орай, Қызылқоға ауданы әкімінің орынбасары Жарас Есенғалиев, аудандық жер қатынастары, сәулет және қала құрылысы бөлімінің басшысы Ержан Нұралин және Қарабау ауылдық округінің әкімі Қанат Хайруллин жергілікті тұрғындармен кездесіп, пікірлерін тыңдады.

Белгілі болғандай, аталған шаруашылық жеке қыстағына «Мұздыбұлақ-Қарабау» топтық су құбырынан (қосымша құбыр арқылы) ауыз су алып отыр. Сөйтіп, бағымдағы төрт түлік малын – 500-ге жуық сиыр, бір отар қой және бес үйір жылқыны халық тұтынатын ауыз сумен суарып келеді.

Қарабаулықтар мұндай қарқынмен болашақта сусыз қалудан қауіптенеді. Сондықтан, олар қожалық қосып алған құбырдың заңдылығын анықтап беруді сұрап отыр.

Біз мәселенің мән-жайын аудан әкімі Нұрсұлтан Бисембиевтен сұрастырдық.

– «Мұздыбұлақ-Қарабау» топтық су құбыры 2012 жылдан бастап «Асыл-Агро» шаруа қожалығына сенімгерлікке берілген. Сенімгерлік шартының мерзімі ағымдағы жылдың қазан айында аяқталады. Қазір халыққа осы мекеме арқылы заң талаптарына сай тұрақты ауыз су беріліп отыр. Атап айтқанда, Қарабау және Бұхар ауылдарына күз-көктем айларында тәулігіне 50 тонна, жаз айында тәулігіне 120 тонна су беріледі.

2008 жылғы 15 желтоқсандағы №723 мемлекеттік комиссия хаттамасына сәйкес, Мұздыбұлақ жер асты су қоры тәулігіне 170 тонна су пайдаланған жағдайда 27 жылға немесе 2035 жылға дейін жетеді деп қорытынды берілген.
Енді тұрғындардың шағымына келсек, олардың айтып отырған мәселесінің заңдылығы жан- жақты қарастырылатыны, сондай-ақ, биылғы жылдан бастап осы топтық су құбыры мен ауылішілік су құбырын республикалық меншікке беру жұмыстары жүргізіліп жатқандығы ескертілді, – деді Нұрсұлтан Орақұлы.

Айта кетейік, «Асыл-Агро» шаруа қожалығы Қарабау ауылынан 17 шақырым жерде орналасқан. Мал шаруашылығымен айналысу мақсатында 2011 жылы 5 мың гектар жерді жалға алған.

Амандық САҒЫНТАЙҰЛЫ

Бұл туралы «Атырау жылу желілері» АҚ хабарлады.

Ақпаратқа сүйенсек, 20-21 сәуір аралығында магистральдық жылу желілерінің гидравликалық беріктігі мен тығыздығына сынау жүргізіледі. Осыған байланысты бұл күндері тұтынушыларға ыстық су беру тоқтатылады.

• «Жазатайым оқиғаларды болдырмау үшін сынақ кезеңінде жылу трассасының құбырларына 10 метрге дейін қашықта жақындамауды сұраймыз. Құбыр бойында олқылықтар пайда болған жағдайда жедел хабарлауды сұраймыз» делінген кәсіпорын таратқан ақпаратта.

“Көптоғай ауылына Атырау облысы әкімі Махамбет Досмұхамбетовтің  тапсырмасымен облыс әкімінің бірінші орынбасары Серік Айдарбеков, облыстық мәслихаттың хатшысы Әлібек Нәутиев пен ҚР ҰҚК Шекара қызметі Атырау облысы бойынша департментінің бастығы Асхат Ахметов арнайы барды” деп хабарлайды Атырау облыстық коммуникациялар қызметі.

Олар Мемлекеттік шекара бойында орналасқан инженерлік қоршаулар жүргізуге қатысты жергілікті тұрғындармен тілдесіп, олардың өтініштері мен ұсыныстарын тыңдады.

Өз кезегінде облыс әкімінің бірінші орынбасары Серік Айдарбеков “Сіздер айтқан барлық ұсыныстар мен талаптарды облыс әкімі мен тиісті мемлекеттік құзырлы органдарға жеткіземіз. Оны жан-жақты қарап талқылау, зерделеу үшін, әрине, уақыт керек. Шешімі шыққаннан кейін, қосымша хабарлаймыз” деді.

Қазіргі таңда тұрғындардың өтініштеріне байланысты малды өзеннен суаруға, балық аулауға және ауыз су ретінде пайдалануға ешқандай кедергі жоқ. Шекара қызметі тұрғызып жатқан инженерлік құрылғылар (қоршаулар) тоқтатылды. ҚР ҰҚК Шекара қызметі Атырау облысы бойынша департаментінің бастығы Асхат Ахметов қоршаулар алынған соң алдағы уақытта Мемлекеттік шекара маңында жайылып жүрген малдарын қадағалаусыз жіберіп, олардың  арғы бетке өтіп кетпеу мәселесіне әр азаматты жауапкершілікпен қарауға шақырды.

Сондай ақ, ол Мемлекеттік шекара бойында әртүрлі шаруашылық түрлерімен айналысуда, әсіресе балық аулау, мал күтімдері кезінде жалпыға бірдей заң аясында әрекет ету керектігін атап өтті. Бұған қоса ҚР азаматтарына Мемлекеттік шекара белдеулерінде шаруашылықпен айналысуға арналған рұқсаттама рәсімдеу түрлері біршама жеңілдетіліп, электронды түрде қысқа мерзімде жүзеге асырылып жатқандығына да тоқталды.

“Атырау облысында жыл басынан бері атқарылған іс-шаралардың нәтижесінде кәмелетке толмағандар арасындағы қылмыс 55 пайызға азайған” деп хабарлайды облыстық білім беру басқармасының баспасөз қызметі.

Бұл туралы облыс әкімінің орынбасары Бақытгүл Хаменованың төрағалығымен өткен кәмелетке толмағандардың істері және олардың құқықтарын қорғау жөніндегі облыстық комиссияның
кезектен тыс отырысында айтылды.

Белгілі болғандай, 2021 жылдың үш айында облыс аумағында  жасөспірімдерге қатысты  25  қылмыс тіркеліп, ішкі істер органының есебіне алынған. 

Облыстық Полиция департаменті жергілікті полиция қызметі басқармасының басшысы Әлібек Қайровтың мәліметінше, қылмыстың дені облыс орталығында тіркеліп отыр.

“Қылмыс негізінен  жәбірленушілердің  жақын туыстарымен жасалған”, – деген Әлібек Қайров жасөспірімдерге қарсы жасалынып жатқан қылмыстардың, оның ішінде жыныстық тиіспеушіліктің алдын алу мақсатында бірқатар ұсыныс айтты.

– Тұрмыстық , күш көрсету зорлығы, психологиялық зорлық, сексуалдық, зорлық-зомбылық түрлері бойынша ересектер арасында ұжымдық кездесулер өткізіп, жұмысқа қабылдау кезінде кадр мамандарын тестен өткізу керек, – деді Әлібек Қайров.

Облыс әкімінің орынбасары облыстық Полиция департаменті Жергілікті полиция қызметі басқармасына, ішкі саясат,  білім беру, денсаулық сақтау басқармаларына бірқатар тапсырма жүктеді.

–  Кәмелетке толмағандар арасында жасалған қылмыстар азайса да, жасөспірімдерге қатысты жасалған қылмыстардың саны өсіп отыр. Ең сорақысы –  қылмыстар санаты ересектер тарапынан жасалып отырғандығы. Кәмелетке толмағандарға қатысты қылмыс  жасалған және   қауіп төнген жағдайда  құзырлы органдарға хабарласу қажеттілігі туралы ақпаратты халық арасында кеңінен тарату керек. Сондай-ақ, арнайы топ құрып, қысқа мерзімді кешенді жоспарлар жасақтауды тапсырамын”, – деді Бақытгүл Хаменова.

Атырауда «Infinity Fitness» фитнес орталығы «Ashyq» жобасы аясында QR-кодқа ие болған алғашқы бизнес-нысан. Бұл ретте, орталық басшысы Динала Чалиева өзі ынта білдіріп, жергілікті кәсіпкерлер палатасымен кеңескенін айтады, деп хабарлайды Depti.kz тілшісі.

• – Алматыдағы әріптестерімнен локдаунға қарамастан осы жобаның арқасында олардың қалыпты жұмыс жасағанын естідім. Мен де олардан қалғым келмеді. Әрі, бұл халықтың денсаулығын қорғау үшін де қажет. Жаңа қосымша орталыққа келушілердің мәртебесін анықтауға мүмкіндік береді. Мәселен, коронавирустың бар-жоғына тапсырылған сынамасы оң нәтиже көрсеткен тұрғындарға қызыл түс жанады. Олар қоғамдық орындарға уақытша кіре алмайды. Ал, көк немесе жасыл түс жанса, кіруге рұқсат бар, – деді ол бізбен әңгімесінде.

Фитнес орталығына келуші Әсел Балғабаева ұялы телефонына «Ashyq» қосымшасын жүктеп алғанын және оны қолдану өте ыңғайлы екенін айтады. Тіпті, телефон болмаған күннің өзінде жеке сәйкестендіру нөмірін (ЖСН/ИИН) енгізу арқылы да мәртебені оп-оңай анықтауға болады.

Айта кетейік, 26 сәуірде аталған жобаның пилоттық кезеңі аяқталып, аймақтың барлық ауданында іске қосылатын болады. Ал, ай соңында бұл жоба еліміздің барлық аумағын қамтиды деп жоспарлануда.

Жоба қатысушылары QR-код алу үшін infokazakhstan.kz сайтына өтініш беруі керек.

• Сондай-ақ, қосымша сұрақтар бойынша Telegram мессенджеріндегі @support_ashyq_bot қызметіне немесе өңірлік кәсіпкерлер палатасының 8(7122)763657, 87025001308 (Еркінбек), 87075093088 (Еркебұлан) нөмірлеріне хабарласуға болады.

Амандық САҒЫНТАЙҰЛЫ

Көктемгі әскерге шақыру науқаны барысында Атыраудағы әскери бөлімі  Түркістан және Алматы облыстарынан келген  100 жас сарбазбен толықты, деп хабарлайды Depti.kz тілшісі.

Әскери бөлімге келген жас сарбаздар алдымен коронавирустық инфекцияға ПТР тест тапсырып, карантинге оқшауланды. Олар бір ай бойына алғашқы әскери дайындық бағдарламасын меңгеретін болады.

– Бөлімшеде жас сарбаздар үшін барлық  жағдай жасалған, казарма қоры дайындалған, жиын өткізетін де орындар бар. Тәжірибелі офицерлер мен сержанттар сарбаздарға әскери істің негіздерін үйретіп қана қоймай, оларға жаңа ортаға бейімделуге көмектеседі, – дейді рота командирі капитан Нұрбек Айтқалиев.

Жаңадан келген сарбаздарды бәрі де әскерге өз еркімен келген.  Әрқайсысынан ерекше  ынта-жігер байқалады.  Әсіресе, Түркістан облысынан  келген Жасұлан Батрашев  бірінші күннен  ерекше көзге түсті.

– Міндетті әскери қызметке барамын дегенде, ата-анам еш қарсы болған жоқ, керісінше қолдады. Қызметтің алғашқы күнінен бастап маған офицерлер мен сержанттардың жас сарбаздарға және олардың қызметіне деген көзқарасы ұнады. Бізге тәртіп пен әскери істі барынша  түсіндіруде. Біз күнделікті әскери өмірге біртіндеп үйреніп жатырмыз. Сонымен қоса,  сарбаздардың асханасы да жақсы екен, тағамдары да ерекше , – дейді Жасұлан.

Алдағы уақытта  жас сарбаздар өз Отанының толыққанды қорғаушысы атану үшін  салтанатты жағдайда өтетін  Әскери ант қабылдау рәсіміне қатысады. Сол үшін олар әскери нұсқаулық пен әдістемелік сабақтардан өтуге, дайындықты бастап кетті.

“ҚР ҚМ Атырау гарнизоны бойынша баспасөз қызметі”