«Денсаулық сақтау басқармасы облыстық аурухананың қызметкері Covid-19 жұқтырған деген мәліметті растамады», – деп хабарлайды Атырау облысының Өңірлік коммуникациялар қызметі.
Аталған басқарманың хабарлауынша, әлеуметтік желілерде таралған «Қызылқоға ауданының тұрғыны – 100 адамның инфекция жұқтыруына себепші болды, оның ішінде медицина қызметкерлері мен емделушілер бар» деген ақпарат шындыққа жанаспайды.
– Облыстық ауруханада 28 жасар әйелмен байланысқан тек 27 адам бар. Оның ішінде медбике мен пациент қана COVID-19 жұқтырған. Ал, қалған емделушілер мен қызметкерлер, яғни 25 адам оқшауланып, карантинге жатқызылды, – деп нақтылады Атырау облысы Денсаулық сақтау басқармасы.
Айта кетейік, жалған ақпарат таратқаны үшін құқық бұзушы – ҚР ҚК-нің 274-бабы «Жалған ақпарат тарату» бойынша жазаланатын болады. Оған 5000 АЕК көлемінде айыппұл, не сол мөлшерде түзеу жұмыстары немесе 2 жылдан 5 жылға дейінгі мерзімге бас бостандығын шектеу, не сол мерзімге бас бостандығынан айыру қаупі төніп тұр.
