АТЫРАУДА

Атырау облысында жол апатынан бес адам көз жұмды.Облыстық полиция департаментінің баспасөз қызметінің мәліметінше, оқиға 26 маусым күні сағат 16:00 шамасында болған, depti ATPress.kz.

“Республикалық маңызы бар Доссор–Құлсары–Бейнеу тасжолының 31-шақырымында Toyota Hiluxe және Hyundai Tucson автокөліктері соқтығысқан. Жол апаты салдарынан Hyundai Tucson​ көлігін​ің 37 жастағы жүргізушісі мен оның 4 жолаушысы оқиға орнында қаза болды. Toyota Hiluxe автокөлігінің жүргізушісі мен жолаушысы түрлі дене жарақатымен облыстық ауруханаға жеткізілді” деп хабарлады департамент.

Көлік апатына жол ережесін сақтамау себеп болған. Қазір тергеу амалдары жүргізіліп жатыр.

5 қаңтарда Атырау облыстық әкімдігі ғимаратының артындағы митингте жергілікті тұрғын Алмаз Берекеновке оқ тиіп көз жұмған болатын. Алайда оның өліміне байланысты қозғалған қылмыстық іс аяғына жетпей тоқтатылды, depti “Ақжайық” сайты. 

Іс бойынша жәбірленуші Жаннат Берекенова полицияға 27 қаңтарда арыз беріп, жиенінің өліміне кінәлі адамды тауып, заң бойынша жаза тағайындауды талап етті. Қылмыстық іс ҚР ҚК 99-бабының 1-бөлігі “Кісі өлтіру” бойынша қозғалды. Оны Атырау облысы полиция департаменті өзіндік қауіпсіздік басқармасының аға тергеушісі Дәурен Айдосынов жүргізді. 29 сәуірде ҚР қылмыстық іс жүргізу кодексінің 35-бабы 1-бөлігінің 2-тармағы әрекетте қылмыстық құқық бұзушылық құрамының болмауына байланысты іс тоқтатылды. Бұл мәліметті Жанар 21 маусым күні ғана білген.

“21 маусымда маған полиция департаментінен хат келді. Онда 23 мамырда белгіленген іс тоқтатылғаны жазылған. Келесі күні таңертең тергеушіге қоңырау шалдым. Ол хаттың 16 маусымда жіберілгенін айтты. Мен одан неге істің тоқтатылатынын алдын-ала хабарламағандарын сұрадым. Шын мәнінде, менің ағамды атып өлтірген полициядің кім екені тергеу барысында анықталған болатын. Ол тіпті менімен де, отбасымызбен де кездесіп, көңіл айтқан жоқ. Мен онымен кездесуді талап етемін. Неліктен ол кем дегенде кешірім сұрамайды?” деді Жанар Берекенова.

Ол ағасын өлтіру фактісі бойынша қылмыстық істі тоқтату туралы қаулының көшірмесін полиция департаментінен 23 маусымда әрең дегенде алғанын айтады. 

“Полиция департаменті бастығының орынбасары Әділхан Теміржанұлы Байдосовқа хабарласып, қаулыны алдым. Ол мені қабылдады. Мен одан кінәлі адамның неге бізбен кездесіп, кешірім алмағанын сұрадым. Сауалдарымның орынына тек кешірім сұрай берді. Басқа ештеңеге жауап қатпады”, – деп қосты Берекенова.

Бұл атысты жасаған полиция қызметкері қылмыстық іс бойынша күдікті ретінде емес, куәгер ретінде қатысқан. Жауап алу кезінде ол оқ атардf қарсыластың басынан емес бүйіріне көздегенін, алайда ол атылғанда айналып барып тигенін мәлімдеді. Тергеуші Айдосынов Беркеноваға іс бойынша полицейдің өзін-өзі қорғауға құқығы болғандықтан куәгер ретінде қатысқанын, прокуратура қарудың өзін-өзі қорғау үшін қолданылғанын және бұның заңды әрекет екенін жеткізген.

Берекенова қылмыстық істі тоқтату туралы шешімді заңсыз деп тану және әділ тергеу жүргізу талабымен прокуратураға шағым бергісі келеді.

“Сеземін, қарға қарғаның көзін шұқымайды. Бірақ мен істі соңына дейін жеткіземін” деп қорытындылады Жаннат Берекенова.

Жаз бастала салысымен Атырау қаласы тұрғындарына масаның маза бермейтіні анық. Жыл сайын осы мәселені шешу үшін облыстық бюджеттен қыруар қаражат бөлінеді.

Мысалы, былтыр қансорғыштармен күресуге 126 млн теңге бөлінген еді. Бірақ дезинсекциялық жұмыстарды жүргізген мердігер компанияның жұмысына халықтың көңілі көнши қоймады.

Биыл аталған жұмыстарға 129 млн 995 мың теңге бөлінді. Бұл – бұрын-соңды болмаған рекордтық сома. Соған қарамастан, осы жылы атыраулықтарды шіркейдің шамадан тыс көбейіп кеткені де қатты алаңдатуда.

Мамандардың айтуы бойынша, шыбын-шіркейдің көбеюі айдындарға судың көптеп келуінен болуы ықтимал.

Қалай десек те, бүгінгі жағдай кішкентай зиянкестермен күрес жолында мемлекет тарапынан кешенді шешімдер қабылдануы тиіс екенін көрсетеді. Өйткені, өңір тұрғындарының таза ауада демалуы мүмкін болмай тұр.

Ару ҰЗАҚОВА,
Х. Досмухамедов атындағы университеттің 4-інші кешкі бөлім студенті

Атырауда еңбек сіңірген жаттықтырушы, халықаралық дәрежедегі төреші Қошқарбай Табынбаевты еске алуға арналған самбодан алтыншы Халықаралық жасөспірімдер турнирі басталды, деп хабарлайды Атырау облысы Өңірлік коммуникациялар қызметі.

Әзербайжан, Өзбекстан, Ресей және Тәжікстаннан 300 спортшы қатысып жатқан турнир биыл алтыншы рет өткізілуде.

“Халықаралық турнир жыл сайын облыстық Дене шынықтыру және спорт басқармасының және спорттық және жауынгерлік самбо федерациясының қолдауымен өткізіледі. Біздің мақсатымыз – самбоны насихаттау, дамыту және қазіргі жастарды осы спорт түріне тарту” деді турнир ұйымдастырушысы Қайрат Досқалиев.

Ал жарысқа қатысушы жерлес спортшыларымыздың мақсаты – чемпион болу.

“Самбо олимпиадалық спорт түрі емес. Бірақ жыл сайын жастардың осы спорт түріне деген қызығушылығы артып келеді. Турнирге бір ай бойы дайындалдым. Бүгін мен 38 кг салмақ дәрежесінде сынға түсемін, менің мақсатым – чемпион болу және Қазақстанның Туын көтеру” деді қатысушысы Серікқали Әсет.

Айта кетейік, Қошқарбай Табынбаев 1960 жылы Атырау облысы, Қызылқоға ауданы, Мұқыр ауылында дүниеге келген. Ол – аймақтағы самбо мектебінің негізін қалаушы. Сондай-ақ, Қазақстанда және шетелде бірнеше спортшы тәрбиелеп өсірген бапкер. Олардың арасында Бисенбай Қошқаров, Болат Жұмабаев, Ринат Ибрагимов және ағайынды Арман, Амантай, Нұрлан Үсиевтер бар. Аталған турнир екі күнге созылады.

Атырауда дренажды канал жобасы сәтсіз болып шықты. Оған жергілікті бюжеттен екі миллиард теңге жұмсалған. Он бес шақырымға созылған каналдың мәселесі көптен бері талқыланып жатыр, деп хабарлайды Atameken Business порталы.

Канал топырақтағы тұзды азайтып, айналадағы микроклиматты жақсартады деген жоспар болған. Алайда жоба сәтсіз болып шықты. 20 жыл өтсе де, тұзды суды бұрып әкетуге арналған құрылыс нысанынан еш пайда жоқ. Бүгінде “Ерик мостовой” деп аталатын каналда ағызатын сулар жиналып, күл-қоқыс үйіліп қалған. Атырау қаласы арқылы өтетін каналдың құрылысы 2000 жылы басталған болатын. Содан бері 20 жыл өтсе де, пайдасынан зияны көп сияқты. Каналдың бойында тұратын адамдар жасыл желекті көріп отырған жоқ.

“Каналдан келетін иіс сасып тұр. Ылғи бірдеңе шіріп жатады. Ол жақтан шыбын-шіркей мен маса қаптап келеді. Кешке қарай серуенге шыға алмайсың” дейді қала тұрғыны Әсем Индирова.

Жоба авторлары каналда жерасты тұзды сулар жиналады деп жоспарлаған. Ал Жайық өзенінің ағынды сулары оны ары қарай алып кетуге тиіс еді. Алайда канал өзеннің деңгейінен жоғары болып шықты, су өздігімен ақпай қалды. Каналды көміп тастауға да ұсыныс болған. Алайда экологияны қорғап жүрген белсенділер мәселені басқа жолмен шешу керек деп санайды.

15 шақырымға созылған каналдың мәселесі көптен бері талқыланып жатыр. Былтыр жергілікті билік халық арасында сауалнама өткізіп, ұсыныс жинаймыз деген. Бірақ әлі күнге дейін нақты шешім жоқ.

Атырау қаласының әкімшілік құқық бұзушылық бойынша мамандандырылған соты ұсақ бұзақылық бабы бойынша 28 ер адамға қатысты істі қарады, деп хабарлайды “Ақ Жайық” сайты.

Жаппай төбелеске қатысқан екі адамға 15 315 теңге көлемінде айыппұл салынды. Қалғандары бюджетке 10 721 теңгеден төлеуі тиіс. Атырау облысы полиция департаментінің баспасөз қызметінің мәліметінше айыппұл салғандардың 25-і – Ақтөбе облысының тұрғындары.

“Әкімшілік жаза шарасын анықтау кезінде сот ауыр мән-жайлардың болмауын назарға алды. Жауапкершілікті жеңілдету ретінде олардың жасаған ісіне өкінуі, отбасылық жағдайы, сондай-ақ алғаш рет әкімшілік құқықбұзушылық жасағаны танылды” depti соттың баспасөз қызметі.

Еске салсақ 19 маусым күні “Атырау” – “Ақтөбе” футбол матчы басталар алдында стадионның жанында екі команданың жанкүйерлері арасында жаппай төбелес болған еді.

18 маусым күні Атырауда қала маңындағы “Жұлдыз” ықшамауданында қайғылы оқиға болды.

Трактор үй алдынан ор қазып жатқанда су құбыры істен шыққан. Оны 32 және 22 жастағы екі көрші жөндемек болған. Олар төмен түсіп, құбырды жөндей бастағанда, жер опырылып түсіп, жігіттерді басып қалыпты.

Көп ұзамай екеуінің мәйіті ордан шығарылып, шаңырақтарына жеткізілген. Қазіргі уақытта ағайындарының оларды соңғы сапарға шығарғаны анықталып отыр.

“Маусымның 18-і күні “Жұлдыз” ықшамауданында үйдің жанынан шұңқыр қазу кезінде су құбыры істен шығып, екі ер адам жер астында қалып, қаза тапты. Тергеу жүріп жатыр” depti Атырау облыстық полиция департаменті.

Атырау мұнай өңдеу зауытында қондырғы жұмысы екі күнге тоқтайды. Бұған жөндеу жүргізу себеп болған, деп хабарлайды ҚазАқпарат.

«Атырау МӨЗ» ЖШС-нің қоғаммен байланыс бөлімінің мәліметінше, 16-17 маусымда сутекті тазарту қондырғысының жұмысы тоқтатылады.

«Жөндеу жұмыстары құрамында сутек бар газды тазалауға арналған адсорберге жүргізіледі. Қондырғы тоқтатылған кезеңде құрамында сутегі бар газ одан әрі өртеу үшін технологиялық қондырғылардан газдарды қауіпсіз шығаруды қамтамасыз ететін алау жүйесіне жіберілетін болады. Алаудың жану шүмегіне ауа беру арқылы бағанадан шығарылатын технологиялық газдың толықтай жануын, көмірсутектердің бейтараптандырылуы мен буға толық конверсиялануын қамтамасыз етеді. Демек, толық жану нәтижесінде алауда құрамында сутегі бар газдан улы газ түзілмейді» depti зауыттың қоғаммен байланыс бөлімі.

Олардың мәліметінше, алау бағаналары желдің күші мен бағытына қарамастан жану өнімдерінің толық таралуына кепілдік береді. Бұл ретте газдардың шоғырлануы рұқсат етілген нормалардан аспайды. Бұған зауыттың периметрі бойынша орнатылған мониторинг аспаптары дәлел бола алады.