«Қазақ аруы» жобасының талаптары өзгереді ме?
Продюсер Баян Алагөзова 10 жылдық тарихы бар «Қазақ аруы» жобасы маңындағы алып-қашпа сөздерге түсінік берді.
«Ағалар, апалар, таныстарымның таныстары, тағы басқалар хабарласады. «Қыздар кастингке келіңдерші» деп айтамын. «Орын қанша тұрады» деп сұрайтындар да бар. Орын сатылмайды. Бұл жерде нағыз қазақ аруы жеңеді. Міне, көріп тұрғандарыңыздай бәрі әділ өтуде. Біреуді әкеліп қоятындай жағдай емес. «Қазақ аруы» осы он жылдың ішіндегі – ең әділ конкурс. Бірде-бір рет ұрыс-керіс болмады», – депті Баян Мақсатқызы.
Байқау қатысушыларына әншіліктен бөлек бірнеше талап қойылған. Үміткерлер мемлекеттік тіл мен қазақ тарихын жетік меңгеріп, он саусағынан өнер тамған әрі бойшаң сылқым болуы қажет. Бірақ талантыңыз Баян Алагөзованы тәнті етсе, доданың ережесін бұзуға да дайын. Ондай бір жағдай болған да екен.
«Айпақшы, Гүлназ Жоланованың бойы талапқа сай келмеді. Меніңше, қатысушылардың арасындағы ең қысқа қыз болды, шамамен – 167-168 см. Бірақ көргендеріңіздей, тәждің иесі атанды», – депті Алагөзова.
Гүлназ Жоланованың актрисалық қабілетін алыстан байқай білген Баян ханым, байқау шартына қарамай оны алға шығарған. Қазір ол – еліміздегі танымал жас актрисалардың бірі.
