Вакциналаудағы басты қорқыныш – адамдардың екпеге қатысты медициналық тақырыпты жете түсінбеуі
Вакцинация қазіргі эпидемиологиялық ахуалмен күресудің ең тиімді әдісі. Мұндай пікірді Алматы Психикалық денсаулық орталығының директоры Сапар Рахменшеев білдірді.
Алматы Психикалық денсаулық орталығының директоры Сапар Рахменшеев мегаполис тұрғындарына коронавирусқа қарсы екпе жасау керектігін айтты. Оның пікірінше, вакцинация қазіргі эпидемиологиялық ахуалмен күресудің ең тиімді әдісі. Вакциналаудағы басты қорқыныш – адамдардың екпеге қатысты медициналық тақырыпты жете түсінбеуі.
«Вакциналау – бұл жұқпалы ауруларға спецификалық иммунитет құру үшін адам ағзасына медициналық иммунобиологиялық препараттарды енгізу», – деп түсіндірді ол.
Спикер вакцинациядан бас тарту бойынша көптеген зерттеулер жүргізілгенін мәлім етті. Оның айтуынша, зерттеулерде респонденттердің көпшілігінің осы салада тиісті білімі жоқ екендігі анықталған, сондай-ақ олар дәлел ретінде расталмаған ақпарат көздерінен алынған нақты емес достарынан, таныстарынан, туыстарынан, интернеттегі мақалалардан, әлеуметтік платформалардан және басқалардан алынған жалған ақпаратқа сенеді.
«Вакциналанудан бас тартудың себебі – бұл қысқа мерзімде жасалған коронавирус инфекциясына қарсы қолданыстағы вакциналарға сенбеу, аз уақытта жасалса, нәтиже сапасыз өнім пайда болады деген пікір кең таралған. Бұл мәлімдеме бұқаралық ақпарат құралдарынан вакцинациядан кейін өлім туралы алынған ақпаратпен байланысты, содан кейін өлім қорқынышы пайда болады. Әрине, егер адам вакцинаны оның өміріне қауіп төндіру немесе теріс салдармен байланыстырса, ол бас тартады. Бұл қорқыныштар жаппай психозды тудыруы мүмкін, ол қазіргі психология тұрғысынан эпидемия мен пандемиядан кем емес», – дейді Сапар Рахменшеев.
Ол мұндай жағдайларда дәлелді әдісті қолдануды және барлығына қолжетімді тілде баяндайтын беделді және ғылыми ақпарат көздерін зерттеуді ұсынады. Сонымен қатар, ол психикалық денсаулық орталығының мамандары сенім телефоны арқылы күмәнданушыларға кеңес бере алатынын атап өтті.
«Егер адам қатты алаңдаушылық, мазасыздық пен абыржушылықты сезінсе, бұл оның денесінің жай-күйіне тікелей әсер етіп, дерт тудырады. Құзырлы мамандардан вакцинаның оң әсері туралы нақты, тексерілген, ғылыми негізделген ақпарат алғаннан кейін ғана ол тынышталады», – дейді Орталық директоры.
Сөз соңында Сапар Рахменшеев салауатты өмір салтын ұстануға, психикалық және физикалық белсенділікті қалыпқа келтіруге, ұйқының оңтайлы кестесін құруға және сергек жүруге, таза ауада серуендеуге, позитивті ойлауға және жалған ақпаратқа сенбеуге, қауіпсіздік шараларын ұстануға кеңес берді.
«Егер денсаулық нашарласа, онда тез арада дәрігердің көмегіне жүгінген жөн»,- дейді ол.
